有做蜀條《福州話部分字之俗讀》，〈序〉貼着下底。

---

福州儂㑚對世乇字其讀法有爭議，一般愛參考《戚林八音》[有校註其版本：李如龙, 王升魁. 戚林八音校注. 福州, 福建人民出版社, 2001, ISBN 978-7-211-02022-5. 下底表裏勢其頁碼也是這本書其。]。《戚林》敆福州話裏勢，有蜀種權威其地位。Dictionary of the Foochow Dialect[Maclay, R. S., C. C. Baldwin & S. H. Leger. 1929. Dictionary of the Foochow Dialect. 3rd Edition. Kwang Hsüeh Publishing House.]（學界翻譯做《榕腔註音字典》，有中文翻譯號𡅏《閩英大詞典》）是百上年之前遘福州其傳教士編纂其，收其字、詞野価，故加出版遘現刻也野𣆯去，經歷了時間其考驗，也有很価儂會掏來參考。

㑚是講，語言一直敆𡅏變化，有其字其讀音，敆有其儂其喙裏勢，會發生仂囝變化：嚽有可能是乞普通話影響去，也有可能是福州話本身其變化規律[譬喻講長樂、馬祖有其腔將「先生」sing⁵⁵-nang⁵⁵讀做sing⁵⁵-niang⁵⁵，閩清有其腔將「日本」讀做「肉本」（nyk⁵）。故有敆閩侯、長樂有其老儂都開始將「現在」hieng⁵³-njai²⁴²讀做sieng⁵³-njai²⁴²，「今旦」ging⁵³-nang²¹³讀做zing⁵³-nang²¹³。嚽無辦法都怪普通話，有可能是韻母裏勢其「i」導致聲母會變化。到底怪普通話，故是自然其變化，着對這樣款其情況做囇系統其考查，儥使單單怪嚽怪佪。]。有其變化，因爲影響恰大去，相當於福州儂差不多都認可去[譬喻講「廁所」其「廁」字，本底是讀zeoy²¹³，《戚林》《閩英》都這樣款記，仱現在基本上都讀caik²⁴，城裏老儂都野価這樣款讀。]，這樣款其新讀音有收錄着20世紀末期其詞典裏勢[譬喻講「廁」其caik²⁴音收錄着：冯爱珍. 1998. 福州方言词典. 现代汉语方言大词典. 江苏教育出版社.]。㑚是講伓是所有其變化都乞所有儂接受：有其儂會罵這樣款讀賺去，正宗其福州話無能耐傳承落去；有其儂有意識遘這樣款音儥着，但是平常間講話就悗講悗使去：反正這樣款其音，可能影響都很大去，㑚是講到底儥正規。

2015年，出了蜀本《福州話實用字典》[這蜀本詞典儂家見覺野重要，重要是因爲前蜀世紀尾其兩本詞典之後，野𣆯都無平話其詞典有能耐敆中國大陸掏着版號去出。故加嘻前後福州許兩家報館，對這本書做去野価宣傳，這樣款野価一般儂都仈轉，社會影響有了。
這蜀本詞典，故有尾斗閩江學院做其電子版（現刻無了），喚起嘻前後我對平話其興趣，使我開始母語覺醒。
我故會記許蜀年其5月3號暝晡，我坐我爸車後斗，遘後街，有蜀間書店號𡅏「半畝陽光」（現刻也儥仈故有無），報紙講《字典》㑚這所有賣。前蜀禮拜日遘這所，門都關去。這蜀日特零意早仂囝，仱會赴去。
我行裏去，故見覺野畏羞，見覺福州話儥應該是「儂家這蜀襯年輕儂」其語言，做細遘大身邊都是這樣款吓。敆書櫥前斗我踅來踅去無敢掏，尾斗鼓起勇氣掏下，去結帳，結果聲音恰嫩去店員故無聽見，我故着大聲仂囝介講蜀回。嘻前後我故無敢使福州話買乇，是講普通話。
行出書店，正好雨煞無偌𣆯，空氣野鮮，我喙擘大𡅏吸，心𡅏都會哄，盡像做賺事去，或且突破了世乇禁忌。封面七芘燙金其大字，寫了「福州話實用字典」，看過去野俊。以前同學之間罵儂正會使其「方言」，白紙烏字印着者書裡勢，野神聖。我爸也有看出我緊張，簡單問蜀句「買到啦」，我應講「嗯」，儂家就轉厝去。
轉厝翻開這本書，頭頁〈前言〉就講福州話歷史生乇款，標準生乇款（當然了現刻見覺強調標準是對別其腔其暴力），我讀完見覺野霸。盡像我幼兒園大班乞送裏語訓班，學普通話朗讀，收遘其教案頭頭句就講「普通話是以北京語音為標準音，以北方官話為基礎方言，以典範的現代白話文著作為語法規範的通用語」。福州話也有歷史有標準，伓啻「翹䐯𠚺嚗」，伓是鳥語犬吠，是蜀門語言了。（以前語言學家Kirsten Refsing做田野調查，採訪遘蜀隻阿伊努族其婆婆。這隻依婆講伊做細前後，大和族其伲囝哥囝告訴伊，伊發出其都是犬吠蜀樣無意義其聲音〈just meaningless sounds like the barking of dogs〉，由是伊認爲自家母語伓是得體其語言〈not a proper language〉，蜀世儂都無敢公開講出來。十幾年前，阿伊努語㑚長下10隻母語者。）
詞典裏勢其字有拼音，但是無聲音，拼音儥仈讀，以後我就蜀字蜀字掏乞我翁看，央伊讀我聽，這樣款去熟悉音系。這本詞典現在也敆我手邊。]。有其《戚林》《閩英》嘻前後故無，或且無乞收錄其讀音，敆這本詞典裏勢野価。有其儂比較直接，就講都是賺[按老骹骹其講法就是「錯，錯，錯」，「竟使豎子成名」，介問汝是伓是中文系其，「豎子」世乇意思會仈儥？]。儂家也無興趣講伊儥着有賺，分世乇對錯[萬一是符合規律其變化，儂家講都怪普通話，嚽復伓是冤賴儂去？]。儂家就講嚽是「俗讀」。仱《字典》對俗讀其收錄，就會比較激進。

試𡅏敆這蜀篇文章，對福州話其「正確讀音」做囇定義，佪就是：

1. 《戚林》收其；
2. 《閩英》收其（有其儂獲《閩英》做證據，也有儂嫌《閩英》有賺）；
3. 雖然前兩芘無收，但是大部分儂都接受其；悗算故有仂仂囝儂講者發音伓是世乇「古音」[伊各儂會講嚽伓是古齊音、古晉音、古吳音、古唐音㗎！]，也無敢講嚽有賺。

如果將1遘3看做是蜀種同心圓，1敆臺中，接下是2，3是墘墘，佪悗遘中心悗正確，悗遘邊緣悗錯誤。雖然講正確共錯誤無分程度，賺就是賺，無賺就是無賺，㑚是講有其乇就是比別其更更正確。同心圓之外其，就是有儂講、有儂嫌其「錯讀」[敆有其討論平話、研究平話其網絡羣組裏勢，我會看見「盡去野有意思」其講法，號𡅏「病毒音」「雜化」，或且「乞污染去」。嚽讓我想遘《疾病其隱喻》，異質其乇乞儂看做病毒，侵犯本底純潔其軀體，讓伊有病，着乞這樣款其污染都掘去，掘賺去都伓驚，掘之而後快。]，或且講俗讀了。

雖然儂家儥愛分俗讀其對錯，㑚是有其前後，講比較正確其讀音，就是比較保險。現在散佈全世界其福州儂，除𡅏有意識其，基本上伓去看《戚林》了，甚至福州話有字典、詞典都儥仈。仱伊各儂聽見世乇音無聽過，就會跳出來講伊「兩個聲」。者前後哩，乞捨落其這隻儂㑚有能耐掏出《戚林》，講老祖宗就是這樣款講其[《閩英》都無一定好使，儂會講嚽是紅毛囝寫其書，紅毛儥仈平話，寫其都是賺吓世乇世乇。]，佪對面就明白事理了；悗算有其儥服，佪伊也無敢講有賺，㑚是辯講舊底底其話現刻無儂講了。故此講，有其前後分別俗讀，會滿足保險其需要。故有就是對愛好研究語言其儂來講，各色讀音其來由本身就野有味，故此也會使分蜀分，滿足好奇心。

既然是俗讀，佪永遠記儥完，儂家㑚使聽着世乇記世乇，並且着是聽着野価回，盡価儂講其，記這所正有意義；㑚無有其儂可能之前之後都無賺，㑚有蜀回講賺去，嚽就儥穩定，也無辦法考察了。這蜀點，故着起動讀者多多包涵。㑚有世乇卜補充、卜糾正其，也歡迎講。

2023年5月7號暝晡序