事际着蜀件蜀件做,就像……

我嬷告我爸名字,讲:「侬家来做蜀芘游戏!」游戏蒋做哩?目睭䀫去,仱伊敆许所计时间。蜀开始计时间,逢乇都儥使做,坐𠲥。等遘自家见觉差不多蜀分钟了,目睭擘去,报告。

我嘻前后正好敆厕所𠲥坐。㗏哈。我蜀听,见觉野有味吓。偷偷喏参加。

仱参加。我无做声算时间,一、二、三、四……台中故停了两三回,我都见觉野価秒无算裡去,等囇超时去。算遘六十,我目睭擘开去报告。

㑚是讲报告完,伊两只无声音。过仂𣆯,乍有闹钟撄𠲥叮铃铃叮铃铃。复过去仂𣆯,我嬷告我爸其名字,问伊蒋其了。仱我爸听讲时间遘去,都过十秒去,车疑去。伊见觉无这满快。仱我是提前六秒。

「仱侬家蜀只快,蜀只慢,嚽是世乇意思哩?」我问。

我嬷回答讲:「如果蜀只侬比较轻松,时间就野慢;比较紧张,时间就野快。我公司有蜀只同事嘛,哇伊尽夸张,伊坐两分半去都无做声。」

「佪我野紧张吓。着蒋做噜——?」

「着蒋做?事际蜀件——蜀件——做了哇。」

「着蜀件——蜀件——做呵?佪我现刻屎也着蜀条——蜀条——拉。」

伊哈哈哈大笑。

Discover more from 山月

Subscribe now to keep reading and get access to the full archive.

Continue reading