今旦日天烏烏，雨無逿若夥。盡早爬起，搭公交去圖書館。囫圇工都屈裏勢，主要是修了廮著自家租其服務器（伺服器）懸頂其幾芘服務。解決了自託管（self-host）其YunoHost其幾芘問題，包括共pgAdmin4——蜀芘PostgreSQL其網頁端管理界面——裝裏去。解決了自託管WordPress多站點網絡（網路）其緩存（快取）bug。仱發了幾題技術其文章。翻了幾頁哲學共人類學其書。

半晡野蒻，腹佬會枵去，圖書館邊兜討著蜀間橫濱家系拉麵其店囝去食暝。散步歸家。路中，樹，椏椏，箬箬，風吹。暝晡其風復透復凊。轉厝洗蜀下，讀了蜀些日本話教育學其內容。復看蜀看涼臺栽其菜，發芽其故価去。芽芽發出，翻出其塗散落著芽芽周圍。表面其濫塗（因爲有逿雨，表面比茶色故會鎮）共翻出其焦塗（比茶色淺野価）對比盡去鮮明。仱就是去睏，睏的比最近幾個月日都早。月照𡅏房裏盡光。