以前军训，熄灯哨吹去，冇讲会正开始。大家侬会讲同学其八卦、讲鬼古事，也会做蛮笑。㑚是讲伓啻侬家学生未困，先生也无去困，会蜀间蜀间「查房」看俤侬故未困，敆许所讲话。㑚有俤蜀只乞搦着？——仱缠去啰哇。

当然也有同学尽轮活，会总结规律——先生乜乇前后会来；耳尽尖，会听见伊伐步声。有前后房裏做蜀下安静去，就是大家侬都准先生卜来了——当然也有前后准无着，先生无来。无管伊有来吓无来，都尽惊侬，尽刺激。

---

有蜀晡，先生直头无来，同学各侬都野蒻去，野睶去。虽然会睶，无尽想去困。无侬讲话去也廮𠲥学猪珂珂珂乞伊接上，惹侬大笑，仱接世讲脬。

有同学就讲了：「最后蜀只讲话其就是猪唅。」

马上有侬应讲：「汝就是猪咾哇。」

同学回伊：「由现刻起算。」侬就哹嘻嘻偷笑。同学会会意去就大告：「我伓是猪吓我伓是……」囫囵间房裏充满快活其空气。

含无蜀时，所有侬都静去——原来是感觉先生卜来了。这时间，㑚听见门乞轻轻喏开起，有侬行裏，玩了蜀环，讲：「很好，都睡觉了。」（野臒，都有去困。）行出去。

房裏尽安静。儥仈有偌夥𣆯，寝寝许只同学讲：

先生是猪。

---

反应过来，囫囵间宿舍侬都哈哈哈哈哈大笑。

尾斗乞先生听见，问快势无去困，大笑？仱缠去。

---

这几日共以前其同学旅游，暝晡敆旅舍直头伓去困，敆许所讲症，无停无歇；讲好卜去困去，无几秒复开始学猪𧲇𧲇。仱想起者古事。

以上其古事，正好以前共同学做漫画刊物，有画裏四格漫画，军训其前后乞同学各侬看。野有味。

2023年8月27号四更迟，敆鼓岭宜夏村记下