Cō̤-hāi dṳ̆k nguŏk, Sĕ̤ng-hŭng mì máe̤ng
Ciáng-nguŏk sĕk-lĕ̤k màng-buŏ, nguāi gáe̤h hèng-lī buăng diōng sé̤ṳk-siá. Sé̤ṳk-siá gó mò̤ bék-nè̤ng, nguāi cīng-lī uòng, cê-gă chók-muòng, kó̤ siăh Nĭk-buōng-chái. Gĭng-guó bòng-bĕng gì chŏng, háe̤ng-háe̤ng cêng cáh. Chuó diē-sié táe̤k chók góng-góng, iā chiông â̤ ká hiōng dó̤i-méng kāng-muòng-giāng gì bŏ̤-là̤. Hiā sèng-hâiu tiĕng áng mò̤ nióh-òng, sèng-dāu diê-siŏh-ciáh dòng-buŏ-giāng-dé sáe̤k lāu sáe̤k-páu, hĭ-hĭ-chéu…
Có̤i-gê̤ṳng dâi-cié cêng sâ̤, siŏh-nĭk gáu áng dŭ-sê có̤ dâi-cié, gĭ-buōng mò̤ sié-nó̤h hŏk-sĭk cīng-lī huòi-gó (回顧) gì sì-găng. Cuói iâ sê nguāi cê-gă tō̤-sī, cê̤ṳ-ngiĕk-cê̤ṳ-dáik (自業自得). Màng-buŏ ng kó̤-káung lāu! Ciŏng-uâng ô sì-găng lāu. Dáng-sê bô mò̤ cĭng-sìng lāu. Bèng-iū báik-diòng lāu cī giông dâi-cié, gōng nguāi tiăng: „Nṳ̄ diŏh có̤ biĕng-cié hâu-ê̤ṳng (邊際效用)…
Muōi siŏh huòi gáu chuó diē-sié, nguāi bók-lō̤ bī nguāi gó huăng-hī, ĭng-ôi — bô ô hō̤ siăh gì nó̤h lāu! Găk chuó siăh buông, muōi siŏh huòi nguāi dŭ mâing-mâing siăh, gâe̤ng ngiê-dāu mâ̤ siŏh-iông. Cuòi sê ká̤-sié lī?
Nguāi iā dṳ̆ng-é «Nâ Nguāi Mò̤-diŏh gì Siàng-chê». Ciō-ìng-gŭng hĭ-sĕng lāu cê-gă, sìng-ciòng lāu dài-gă, có̤i-hâiu lā̤ ĭ sĭng-găng dák-dák ng-giăng bù-sák, ĭ céng-mìng lāu cê-gă ô nó̤h sāi.
Hók-ciŭ iĕk-tiĕng, tiĕng-ké cêu ng gōng dô̤-lī. Â-dáu buóh chók muòng, muōng ché̤ṳ-siŏh-ché̤ṳ ngiê-dāu, nĭk-tàu cêng chiông â̤ hiĕk diē-lì. Gáu lāu ék-cèng làu, kŭi sō̤-siè, dò̤ chók chiă—dāng sī lāu—tiĕng hàng-bók-siŏh-sì dâung-ṳ̄, muōng dâung muōng duâi. Buóh dĭk-ciék giàng, chiū-uōng mā-siông lâng kó̤, giăng cè̤ṳng siŏh-sĭng, diōng-chió dò̤ ṳ̄-ĭ sê̤ṳng. Tiĕng gà̤-dīng dŭ-sê hùng,…
Có̤i-gê̤ṳng ô siŏh giông sĭng-ùng, gōng Ó̤-ciŭ Guók-lĭk Dâi-hŏk gié-sáung-gĭ gáu-sêu siông-dòng sì bóng lāu cūng-uâng gì Dṳ̆ng-ùng cê-iông: „Nguāi mò̤-huák ṳ̀ng-ṳ̄ng hŏk-sĕng cáuk-bê.“ Iā sâ̤ Dṳ̆ng-ùng muòi-tā̤ cé̤ṳ-é gáu lāu cī giông dâi-cié, bó̤-dô̤ iā sâ̤. Dáng-sê dùng-iông siŏh giông dâi-gé, mâ̤ siŏh-iông lĭk-diòng, cêu mâ̤ siŏh-iông biĕu-dà̤.
Hók-ciŭ iā sâ̤ hâiu-săng-giāng ké̤ṳk sì-hèng gì īng-piéng puói-ĭng, pī-ṳ̀-gōng «Gĭ-ké-mà», «Gō̤-chiéu Mâng-uâ Nĭk-huò», kó̤ sŏng-diòng Hók-ciŭ-uâ. Ĭ-gáuk-nè̤ng puói-ĭng gì sì-hâiu, dŭ ciŏng téng cê-máuk kó̤ káng ô nék-giāng gōng cṳ̆-ngṳ̄ gì dài-sṳ̀ uâng siàng kēu-ngṳ̄. Nguāi ī-ùi cuòi ng-diŏh-sié sê ĭng-ôi gĭng-dáng gōng Hók-ciŭ-uâ gì biéng ciēu kó̤ lāu, dáng-sê báik-cĕng káng Hók-ciŭ-uâ Gĭ-dók-gáu…