-
《福州話部分字之俗讀》序
儂家儥愛分俗讀其對錯,㑚是有其前後,講比較正確其讀音,就是比較保險。有其前後分別俗讀,會滿足保險其需要。故有就是對愛好研究語言其儂來講,各色讀音其來由本身就野有味,故此也會使分蜀分,滿足好奇心。 既然是俗讀,佪永遠記儥完,儂家㑚使聽着世乇記世乇,並且着是聽着野価回,盡価儂講其,記這所正有意義;㑚無有其儂可能之前之後都無賺,㑚有蜀回講賺去,嚽就儥穩定,也無辦法考察了。
-
福州话斯瓦迪士核心词列表
注意: 英语 福州话 I 我 you (singular) 汝 he 伊 we 侬家 you (plural) 汝各侬 they 伊各侬 this 嚽, 这芘 that 佪, 许芘 here 这块, 这所 there 许块, 许所 who 底侬 what 什乇 where 底所, 底块 when 什乇时候, 什乇前后, 乜乇前后 how 蒋 not 伓, 伓是 all 全部, 所有, 一切 many 価 some 仂囝, 仂滴 few […]
-
事际着蜀件蜀件做,就像……
我嬷告我爸其名字,讲:「侬家来做蜀芘游戏!」游戏蒋做哩?目睭䀫去,仱伊敆许所计时间。蜀开始计时间,逢乇都儥使做,坐𠲥。等遘自家见觉差不多蜀分钟了,目睭擘去,报告。 我嘻前后正好敆厕所𠲥坐。㗏哈。我蜀听,见觉野有味吓。偷偷喏参加。 仱参加。我就敆心裡势算时间,一、二、三、四……台中故停了两三回,我都见觉野価秒无算裡去,等囇超时去。算遘六十,我目睭擘开去报告。 㑚是讲报告完,伊两只无声音。过仂𣆯,乍有闹钟撄𠲥叮铃铃叮铃铃。复过去仂𣆯,我嬷告我爸其名字,问伊蒋其了。仱我爸听讲时间遘去,都过十秒去,车疑去。伊见觉无这满快。仱我是提前六秒。 「仱侬家蜀只快,蜀只慢,嚽是世乇意思哩?」我问。 我嬷回答讲:「如果蜀只侬比较轻松,时间就野慢;比较紧张,时间就野快。我公司有蜀只同事嘛,哇伊尽夸张,伊坐两分半去都无做声。」 「佪我野紧张吓。着蒋做噜——?」 「着蒋做?事际蜀件——蜀件——做了哇。」 「着蜀件——蜀件——做呵?佪我现刻屎也着蜀条——蜀条——拉。」 伊哈哈哈大笑。
-
發暴
兩個月日之前,天故是焅焅喏,含不蜀時變涼去。共宿舍其河南儂講:「今年暝肯定會凊死。」伊儥相信:「汝這裏無冬天。」福州這五、六年,遘十一、十二月去,故是半寒不暖;敆這幾年來福州其儂,都見覺福州凊天這樣款野正常。秋涼持續野𣆯,宿舍其安徽儂盡滿意,講:「這樣款天氣野爽快。」 前兩禮拜,天變涼涼喏。 <script src=”ht 轉厝開了門,看見我翁,我頭蜀句就是: 哇野寒吓現刻。 㑚是講接下幾日,時不時南風天。本底卜添幾件衣裳,仱就無添。不過我愛去日頭下底徛𡅏,見覺曝𡅏雹雹熱。 前蜀禮拜,宿舍有儂有仂囝嗽,連𡅏幾日都未好。遘拜六,故𡅏啌啌嗽。仱復有蜀隻儂也開始啌嗽;兩隻儂跇頭嗽,這𣆯蜀隻儂嗽,等囇慢另蜀隻接𡅏嗽,實在是伓是心緒。 昨暝日晝,房間裏勢儂氣儥通,熻遘當儥戴去。去洗湯,過涼臺。連𡅏兩日無日頭,心𡅏想仱襶。洗完趕緊吹風機掏吹,無偌𣆯故是有仂囝嗽。宿舍四隻儂,三隻都敆𡅏嗽;儂家開始蠻蠻笑,「乞隔離以後着蔣做」。以前是「爭後恐先」,替儂送飯,現在可以吼別儂:「會替儂家送飯了。」 (間壁厝有儂體溫恰懸去。宿舍四隻儂除去我,都是班長、團支書、生活委員,送飯其責任,伊各儂推來推去,最尾討論出蜀芘解決方案:此刻呶間壁厝去,仱作爲密切接觸者齊去乞隔離。) 遘暝晡,故未好。宿舍儂笑𡅏講,「就是普通其流感了哇」。我凝蜀下,學伊講——不過換了蜀種語言:「ただの風邪!」日本有蜀隻團體,傳播謠言,講這盤其新冠病毒,不過是普通其流感,我學伊各儂其話講笑。囫圇隻宿舍大笑,仱開始擔心留學。 宿舍儂問:「藥食底蜀種比較好?」我有「三九感冒靈」,聽伊這樣款講,我就掏乞伊,伊手搖囇,講自家有「連花清瘟」。仱開始討論底蜀種有影。做細其前後,見覺有風寒囝,就趕緊討藥食;連𡅏幾日,蜀身酸𠴂,儂都野懶,卜想去睏,之後乍會好:大概因爲藥裡勢有安眠其成份,着睏好風寒乍會好。長輩講:「無辦法,汝體儥好,藥食了,快快好,伓通影響讀書。」我也無想恰価。長大了,有其時候風寒去,伓想食藥,睏蜀眠就好了;伓使介食藥,等囇幾日都無體。 儂家野早都去睏了。大半夜啌啌嗽,野価回宿舍儂珂囉,都乞我做拍斷根去。 今旦早起頭更更凊去。有兩隻儂爬起去,攬遘涼臺,卜洗牙齒、洗面,蜀開門就大告「哇」。我共另蜀隻寢寢落牀敆,故敆𡅏頌衣裳、梳頭、護理其藥膏吓水吓挱面𡅏。門蜀開,寒氣揦裡來,像手捻𡅏脰骨;復像墨膏蜀樣,骹腿乞澹通透去,直直澹遘上半身。嘻前後儂家是骹寒手痺,囫圇隻儂都凝去;一直遘有儂轉來,連手關門,盡像有熱氣流過我身體,乍反應過來,見覺有能耐振動了。 嘻前後,我都卜啼嘛了。 宿舍儂廣西其,「恢復感覺」以後,馬上使啼嘛其腔大告 骹尾窿風去,徛仂𣆯,故是野疼。許兩隻儂已經頌好大衣,看過去就盡熱落。儂家凊𡅏呋凇凍,喙𡅏跇頭唸「秋褲」。河南其敆許塊大聲講:「這樣款天氣,伓使秋褲。」 (「罔算遲到,也伓使讓自家喫虧。」宿舍儂逐着我,手摜𡅏食其乇,和和熱。) 想起宿舍儂以前講其話,踝店頭𡅏討熱其乇食。 看見有紫菜飯糰。嗌,嚽以前應該無賣。共莆田老闆攀講:「故有開發新商品吓。」講完就退悔自家講其世乇話,日本儂許樣款。依板倒是野認真,想蜀想,講:「前幾年就有做,汝可能恰遲去(賣澈去)。」 掏𡅏飯糰,我罔抖々罔行,就這樣款去上堂去(文章懸頂其圖)。
-
半暝三更無事做
囫圇日無食歠 大半夜突然塞裏這価乇 (吓也,這下將做吓) 消化藥乞我抾遘底所喇 反々來反々去 倒眠床逢乇都儥做 仱死去 Also on / También en / Aussi sur / Cē̤-sē̤ iâ ô / 這所也有 / 亦可見於 / こちらも: Douban
-
儂共神其共振
發其是今年神田祭迎會其相片。具體來講是回宮。 嘻前後是半晡,我看完展覽,寢寢行出,正好野遠就聽見有儂呼口號。墿邊儂也悗來悗価。 無偌𣆯,開道其儂來了。伊揭𡅏注連繩,面覷前首,伐步穩穩喏。後斗跟𡅏蜀堆儂,頌𡅏出巡其衣裳,手悗拍𡅏手,儂悗回轉頭覷。伊各儂看過都野激動。口號其聲悗來悗大,墿邊其儂悗攀講,悗掏出手機、䀹相機,準備䀹相。 來了,來了。扛轎其盡去野精神,佮𡅏口號向前斗行。㑚是講有蜀隻依伯,儥仈面候徛著墿前斗,吩發先遘其儂攔𡅏無伊行。神轎退後仂囝,但是扛轎其無停下,聲做故大,共神轎齊齊律動,盡像心臟敆𡅏跳。氛圍野熱烈,墿邊其儂也拍手加油。敆煞復有能涯前斗行去,大家儂都告好。依伯吩訴女界去替男界扛轎,離開了墿路。 許蜀日,我故有覷著儂供神明齋,有看見著拍太鼓。㑚是講第一感動我其,故是回宮。儂都講迎會是「儂共神其共振」,看完回宮,見覺真其是這樣款。悗算行裡新其時代,傳統也有能涯好好保護,成為今旦生活其蜀部份,實在是野好。 Also on / También en / Aussi sur / Cē̤-sē̤ iâ ô / 這所也有 / 亦可見於 / こちらも: Douban
-
十六暝晡煙共花
正月十六暝晡,我共行李搬轉宿舍。宿舍故無別儂,我整理完,自家出門,去食日本菜。 經過旁邊其村,巷巷盡窄。厝裏勢𠟶出棍棍,野像會敲響對面檻門囝其玻璃。嘻前後天暗無偌𣆯,前斗底蜀隻丈夫囝蒂甩了摔炮,嘻嘻笑躃去。這邊伲囝哥掏𡅏茨來花,邊兜儂圍蜀環看。盡価其厝門兜廮了盆盆,盆盆貯了涂,插了有碗許滿大其香燒,煙噗囫圇巷巷都是。這大其香,以前㑚敆廟門兜看見過。 行了仂𣆯,安靜仂囝,含不蜀時聽見倏其蜀聲。頭𩓥起去罔覷,是煙花趁這窄窄密密其柴欄厝臺中飛上天空,綻放開去。蜀柎蜀柎,照𡅏地兜暗囇光囇。 蜀墿其煙,滿天其花,我印象臺中做細乍看見過。 18年5月23號暝晡寫,12月23號改了仂囝 Also on / También en / Aussi sur / Cē̤-sē̤ iâ ô / 這所也有 / 亦可見於 / こちらも: Douban
-
儥愛去睏
最近事計盡価,蜀日遘暗都是做事際,基本無什乇學習整理回顧其時間。嚽也是我自家討死,自業自得。暝晡伓去睏了!這樣款有時間了。但是復無精神了。朋友仈傳這件事計,講我聽:「汝着做邊際效用最大其事際。我先生也鼓勵儂家不求甚解,伓使每蜀日逢乇都做的許滿清楚。」 但是,我無辦法啊!
-
起五更早掏書看
今旦我自家也儥仈蔣其了,起五更早𡅏睏儥着,眠牀𡅏輾轉反側。遘此刻五點其時候,肩頭悗變悗儥受,就爬起了。雖然講我肩頭平常就儥好受,時間𣆯去就習慣了;但是過了睏會着倛時間再去睏,復睏儥着,身體倛痛就會放大。 爬起無事做,儥愛覆桌𡅏,就討書掏去悗看。凊天遘六點故是暗,故有野価時間。